波兒變「囤地小寶貝」

【明報專訊】近排被「古洞地皮」事件纏身嘅發展局長陳茂波，前日同噚日都因為要出席立法會發展事務委員會特別會議，聽村民發表關於新界東北計劃嘅意見，想避世都避唔到。但為咗唔想傳媒重演前日「迫餐死」嘅場面，局長噚日「放飯時間」就選擇留喺立法會休息室，Emily仲聽到佢索性柯打雲吞撈麵做午餐。


開會無表情 間中點頭

講返噚日6個鐘頭嘅「馬拉松式」會議，唔少村民喺表達對東北計劃不滿嘅同時，都嘲諷下陳茂波妻子家人喺新界東北買農地。其中，劏房波關注組召集人羅香山仲好有創意咁，將日本動畫《崖上的波兒》嘅主題曲改詞，喺立法會度唱出嚟，原本為「波兒波兒波兒『魚兒小寶貝』」一句，就被佢改成「囤地小寶貝」；亦有小朋友用講故事方式發表意見。陳茂波雖然木無表情，但間中都點頭回應。


陳偉業諷「19局長」

除咗改歌詞同講故仔，人民力量陳偉業仲幫局長改花名，不斷叫佢做「19局長」。事緣前日陳茂波太太發表聲明，話嚿年10月已將持有古洞農地嘅國萬實業37.5%股份，以270萬元轉讓畀自己細佬許嘉麟，若果用許步明當年所持股份約值13萬元計，帳面獲利就有19倍。