南區反佔中議案 拉布「滿天神佛」

【明報專訊】自從「佔領中環」今年頭發起，好多個區議會都有建制派提出反對佔中議案，南區區議會由上個禮拜四開始傾，畀民主派拉布，到凌晨都表決唔到，噚日續會再嚟過，4個民主黨區議員「出盡法寶」。區諾軒用普通話朗讀包括胡錦濤發言嘅動議、儒家墨家點睇佔中；徐遠華講番以前喺內地嘅生活、共產黨嘅問題、念心經「色即是空、空即是色」，傳譯員只能夠譯做「empty is empty、empty is empty」。羅健熙就天主經都攞埋出嚟；柴文瀚直頭化身歷史科教師，教大家第一次世界大戰、韓國光州事件，傳譯員頭都大晒。不過最終都阻唔到議案通過。