爆粗老師教書好溫柔

【明報專訊】近日喺網上流傳一段小學女教師講粗口鬧警察嘅短片，入面嘅主角林慧思咁啱得咁蹺噚日喺港台網站播放嘅《卓越教室》節目上鏡，入面講林老師喺學校教生命教育，對學生關懷備至，並分享自己嘅經歷去引發同學仔思考，佢喺節目入面話希望做到「以生命影響生命」。Emily見到佢同啲學生相處都好鬼融洽，對學生好溫柔。


教生命教育 盼「生命影響生命」

呢名來自寶血會培靈學校嘅女教師，日前喺旺角行人專用區睇唔過眼，指罵青年關愛協會嘅人用橫額覆蓋法輪功嘅攤位，之後警察到場劃咗封鎖線，林老師唔滿意警方冇解釋就要求佢離開警察封鎖線，後來林老師愈講愈激動，之後用英文爆粗鬧警察。


短片喺網上瘋傳後，培靈學校校長發聲明話對林老師嘅行為深感遺憾，林老師亦有發出道歉聲明，向學校、同事、家長同學生道歉。不過，有個資深警務人員就同Emily話，林老師刻意衝撞封鎖線，家封道歉聲明又隻字不提警察，擺明冇誠意，佢話如果有誠意就應該同番嗰日嘅前線警察道歉。之後Emily話佢知林老師上咗個節目講生命教育，阿sir就話真係唔想去評論佢！


有警員批道歉無誠意

家網上有人發起「一人一電郵撐林慧思老師」行動，表達對林老師嘅支持；但亦有另一批網民發起「一人一電郵撐前線警員」行動，要求學校處分林老師。香港警務督察協會就好火滾，發表措辭嚴厲嘅聲明，指當日女教師喺鬧市中，眾目睽睽下粗言穢語，非理性辱罵執法警務人員，要予以強烈譴責。協會仲話，對於一名受專業培訓嘅教師咁嘅表現，如果不加以糾正，「引起的學童公民與德育教育問題，影響深遠，遺禍下一代」。