田少去夏威夷 慢必訪許信良

【明報專訊】學生放暑假，立法會都休會，等議員可以趁機叉電，無論地點遠近，唔少議員都想離開香港唞吓，上星期發展事務委員會通過要求局長陳茂波落台嘅動議，亦可能同議員外遊有關。人稱田少嘅自由黨黨魁田北俊，上星期四已經開始喺facebook上載去夏威夷玩嘅相，一時喺沙灘、一時睇表演，好鬼疏乎。


獨立議員謝偉俊就選擇同伴侶白韻琹坐郵輪玩，佢亦上載唔少相片上facebook，講自己遊黑海同東歐多國嘅經歷，睇吓古蹟，又或喺郵輪hea。工聯會麥美娟同人民力量陳志全就分別去咗台灣，前者係輕輕鬆鬆同家人飲飲食食，但後者去旅行都離唔開政治，先後拜會「倒扁運動」紅衫軍總指揮施明德、前民進黨主席許信良等，唔知係咪要去取經？


財爺下月美國探親

立法會休會，官員亦輕鬆得多，而行政會議今日開埋最後一次會，亦會休息兩個禮拜，但據聞行會召集人林煥光已經等唔切，未開完會已經飛咗去英國，其他非官守成員仍在港。官員方面，財經事務及庫務局長陳家強開始放暑假，8月中先「歸位」；最近被人鬧將會成為「大罪人」嘅財政司長曾俊華，8月就會去美國探屋企人。