辦公室捐「願望成真基金」

【明報專訊】做善事可以捐錢，亦可以如恒地主席四叔咁捐地，而新地主席兼董事總經理郭炳聯就將辦公室捐畀慈善機構，今次受益者係「願望成真基金」。


「願望成真基金」一直協助港澳兩地患重病者達成心願，今年正好15周年，諗住擴展同增聘人手，適逢得到新地支持，令機構第一次擁有自己嘅辦公室，個位置仲喺交通好方便嘅觀塘工業區駿業街。為答謝厚意，機構主席楊紫芝、董事張正甫近日陪同5個5至19歲嘅受助重病病人同埋佢哋嘅家長到訪新地總部，獲郭炳聯款待。


郭炳聯聽咗每個人講佢哋嘅抗病歷程，佢哋仲向郭炳聯送上親手製作嘅圖畫作品。郭炳聯大讚佢哋勇敢同充滿正能量，患重病亦無怨天尤人，之後送上勵志書，鼓勵大家走出病魔，積極面對人生。新地發言人無透露到今次捐助額，但話郭先生一直好支持慈善活動，未來會繼續支持。