消防車裝鏡頭仲未用過

【明報專訊】消防處舊年話喺消防車同救護車裝鏡頭，畀人話侵犯私隱；消防處噚日向立法會提交文件，解釋裝鏡頭係要嚟防止消防車意外，仲進一步透露2008年涉及消防處車輛嘅交通意外有248宗，但舊年已經去到471宗，差唔多倍增，平均每日多過1宗，仲話難確認意外原因。


睇見消防車意外數字，Emily都有啲驚，事關消防處車救急扶危㗎嘛，消防處諗防止意外嘅方法，就係畀錢買新器材，喺車度裝5個鏡頭，錄低點解發生意外，方便日後檢討同訓練。


消防處解釋，鏡頭可以儲存13個鐘頭影像，之後繼續錄就會覆蓋舊影像，仲話司機一熄匙，鏡頭就會熄，叫人唔使擔心會收集個人資料，不過，呢批鏡頭要幾錢，消防就無喺文件提及到，只係話原來去年講到家已有8部車裝咗，但就一直未用過。究竟幾時會開始試驗？消防處話適當時候喎。