國泰推廣「香港精神」

【明報專訊】你眼中嘅香港係點樣？你覺得乜嘢係香港精神？國泰就舉辦咗一個「香港精神．一起飛」攝影及繪畫比賽，話要揀出最能體現「香港精神」嘅作品。國泰準備咗620張可以飛往世界各地嘅機票作獎品，首十名勝出者除咗獲得雙人來回機票，仲可以擺張自己嘅靚樣相喺國泰一架航機機身，聽落都幾架勢喎，自己張相可以日日衝上雲霄喎！


「香港精神」呢個概念好抽象，國泰話大家唔使考慮太複雜嘅野，話「堅毅拼搏」係「香港精神」，「開心好玩」亦都係，只要可以自圓其說就ok。呢次比賽，參賽者要喺8月26日前，以1MB以上、5MB以下嘅原創相片或者圖畫形式，提交到國泰網站。 評審團會揀出十大最佳作品，每名得獎者可以獲得雙人商務客位來回機票，由香港前往國泰或港龍嘅全球特選航點。


得獎者作品或印上飛機

評審團亦會選出100大優異作品，獎品係雙人經濟客位來回機票，呢兩個獎項會喺9月底公布結果，所有得獎者嘅相會整成剪影輪廓，印喺國泰航機上。另外國泰亦喺網上發起公眾投票選出每周最受歡迎嘅作品，結果將喺8月14日至9月4日四星期內每周公布，獎品亦係雙人經濟客位。


滿意今個暑假生意表現

至於國泰嘅生意，總裁史樂山對今個暑假嘅客運表現都幾滿意，話日本線受日圓貶值影響，增長明顯；北美、亞洲嘅表現均可觀，惟歐洲下跌，整體客運量同舊年暑假持平。