馬榮成也反國教 因公錯過今年七一遊行

【明報專訊】創造經典漫畫《風雲》嘅本地漫畫家馬榮成（馬sir），噚日接受商台訪問回顧入行經歷。佢話1989年係人生轉捩點，除咗當年創業外，最重要八九六四民運嘅片段激發咗佢嘅中國心，「我哋咁多年只係匿埋畫公仔，但嗰個年代睇到好多中國嘅畫面，甚至真係會喊，我諗嗰時先發掘中國心出嚟」。


六四後太忙再無遊行

馬sir話當年有上街遊行支持學生，但嗰次之後，咁多年都專注工作無再遊行。之後佢話今年七一本來諗過遊行，但咁啱有公事要上內地去唔到。主持問佢「未來遊行可能有機會見到你嘅身影？」馬sir笑言話「可能係」。


馬sir又講，因工作關係，咁多年嚟經常喺內地同香港游走，感受到香港有好多嘢係內地無嘅，「譬如好似遊行，真係千金難買，即使係一啲好細嘅訴求，只要有得表達，而你有時間仲有機會去表達嘅話，我覺得應該去爭取」。


主持之後問馬sir點睇國民教育，馬sir好堅決話好反對政府強推國民教育，「我覺得應該畀細路自由選取，教細路係要畀好多方面佢哋去明白事理」。佢又話自己唔係一個好講政治嘅人，但日常生活始終同政治息息相關，無可能避免。