小小超讚大佬做得好

【明報專訊】一向惜字如金嘅李澤楷（洋名Richard），噚日出席完公開活動之後，面對喺門外苦苦等候嘅一眾記者，難得笑面盈盈企定定，同記者傾多幾句。雖然成個答問環節只有短短一分鐘，Richard凈係答咗三條問題，但畢竟係「小小超」開金口，小琴已經覺得好驚喜。


長和系今年取消中期業績記者會，令每年常規嘅「國情諮文」都無埋，昨日見到Richard，梗係點都要問吓點解取消業績記者會、係咪要為鍾意低調嘅李澤鉅，從「超人」李嘉誠手中接掌長和系鋪路呢？

稱李家從無考慮撤資

Richard就公開讚大佬，話哥哥李澤鉅已經可以對業務應付自如，意思係應該唔需要通過呢種方法鋪路喔。Richard又話PCCW今年都唔會開業績記者會，不過香港電訊（6823）就會照常見記者。


問到老爸點解要賣咗百佳，Richard話呢個係正常商業行為。有記者問百佳咁大又做得咁好，無端端賣咗都算正常行為咩？Richard就笑住答，李家曾經喺海外有過更加大宗嘅海外資產交易。百佳都唔算大買賣？咁又係，或者對於有過百億做零用錢嘅「小小超」，百佳真係好小事。Richard強調李家從來無考慮從香港撤資。


賣百佳好小事 海外有更大買賣

至於佔領中環、點睇CY同其他政府官員的醜聞呢類沉重話題，Richard就無再作答。不過上車前，有位行家問到佢啲緋聞女友，Richard話同啲女仔都係正常食飯傾偈，「如果咁都算拍拖傳緋聞，我咪好忙？」


email: [email protected]