梁智鴻曾收鹹魚做診金

【明報專訊】有「眾人媽打」之稱嘅民政事務局前常秘李麗娟，舊年4月伙拍資深傳媒人區家麟，主持港台《七百萬人的先鋒》，推出50集專訪50個傑出女性節目後，「媽打」噚日喺傳媒午宴同Emily講，新一輯節目下星期六（10日）晚上10時20分喺港台一台播放，但今次唔再只係訪問女性，改為「男裝版」專訪30名來自不同界別嘅傑出男士，分享佢哋嘅人生經歷，聽嚟好似回顧番昔日香港點滴咁。


好似第一集嘉賓係有「金刀梁」之稱嘅醫管局前主席梁智鴻，老竇原來係中醫，細個住喺香港仔，當年佢仲返區內幫漁民行醫，漁民會用鹹魚當「醫藥費」畀佢，節目仲會講吓「金刀梁」當年點追老婆嘅感情史。


陳祖澤起初唔慣商界

至於馬會前主席嘅陳祖澤，就會講吓自己由政府啱啱轉戰商界嗰陣，點樣唔習慣商界節奏急促喎。


其餘受訪嘉賓仲有社協何喜華、首位華人最高法院首席大法官楊鐵樑、作家劉以鬯、藝術家榮念曾及衛生福利及食物局前局長楊永強等。