匯控非執董 華麗轉身任FBI局長

【明報專訊】匯控（0005）今年初委任嘅獨立非執董高銘（James B Comey），話咁快又要走人啦。唔通匯控獨董咁唔好做？非也，原來呢位美國司法部副部長，早排被美國總統奧巴馬相中，任命佢成為下任聯邦調查局局長（即FBI是也），經美國參議院確認後，噚日正式請辭，9月4日起生效。


主管金融系統風險 上任半年請辭

現年52歲嘅高銘，除咗係匯控獨董，同時出任獅子行新成立嘅金融系統風險防護委員會成員。匯控原本預佢做3年，點知年初委任高銘，到今年3月正式上工，6月已經畀奧巴馬「橫刀奪愛」，9月就要拜拜，即係只係喺匯控做咗半年，打咗個白鴿轉咁。


不過調轉嚟睇，匯控搵到呢位高人入嚟睇金融系統風險，證明好有眼光，兼好有決心搞好啲風險監控，今次畀FBI搶走人才，實在非戰之罪，希望獅子行快啲搵到另一位高人填補高銘個位啦。