「俄味」名Rimsky 袁國強解畫

【明報專訊】好多人都知道律政司長袁國強（圖）嘅英文名係叫Rimsky，究竟點解佢改呢個名呢？袁國強喺最新一期《公務員通訊》解釋，原來佢讀中三嗰年，有一日音樂老師叫咗佢同幾個同學見老師，話佢哋無教名，每次叫佢哋都要連名帶姓，好唔方便，就係咁，音樂老師就幫咗袁國強改名，個名係Rimsky-Korsakov，相信取自一名俄羅斯著名作曲家嘅名。


自覺不才 父母想阿仔讀醫

袁國強話，好彩老師無堅持要將Korsakov放埋入佢嘅英文名，因為佢當時都唔識點串，最後只叫Rimsky。大學讀法律時，佢跟隨一個香港知名大律師實習，對方曾開口要求袁國強放棄Rimsky呢個名，仲話如果唔聽佢講，相信喺法律界好難搵到工，因為無人會委託一個「俄羅斯人」做法律代表。但遭袁國強拒絕咗，果然夠堅持。


講開點解會做大狀，袁國強話佢係細仔，讀中學時老竇已退休，佢知道自己大學畢業後就要自食其力，佢自問唔係高材生，只能讀文科，而嗰個年代男生一般都會讀理科，袁國強為咗向父母交代自己點解要讀文科時，唯有話「我要當律師」，父母唔係好buy，因為佢哋原來想袁國強做醫生。