107動力雨中批康文署

【明報專訊】香港大球場草地因為欠缺保養變成泥地，「107動力」幾個成員噚日專登就呢件事去咗大球場示威，佢哋質疑康文署官僚，根本唔係有心、亦唔懂得點樣保養球場草地，認為局方浪費公帑。唔知係咪叫「求仁得仁」，咁啱噚日都落好大雨，最終107動力嘅成員都淋到好似喺泥地比賽緊嘅球員一樣。


107動力成員戴面具扮成民政事務局長曾德成及康文署長馮程淑儀，諷刺官僚將草地變成泥地後，情願喺石屎地踢足球，亦唔願用大球場。


怕重鋪球場浪費公帑

召集人何民傑話，就算康文署每年花費670萬公帑做維修保養，但仍然球場變泥地，擔心就算重鋪球場，將來草地質素亦會變差，白白浪費千萬納稅人嘅錢。