盧吉道建築申改建酒店

【明報專訊】有發展商申請將山頂盧吉道27號一幢二級歷史建築物改建做酒店，自由黨中西區區議員陳浩濂收到14個當區議員簽名發起反對，要求城規會唔好通過改變用途申請。最新發展係曾經喺度住咗12年嘅姚吉甫醫生，都加入反對行列，佢話自己喺盧吉道揸車出入近萬次，覺得條路好窄，質疑建築物狀態好好，點解要變酒店。


指會令交通問題惡化

姚吉甫話，由盧吉道街口駛到27號，差唔多要轉40個彎，每次架車嘅防撞欄都差唔多要掂到路邊。佢仲話一年有幾次，目擊有車會唔小心入咗盧吉道單程路，想退番架車出去，都要4個鐘頭！如果盧吉道27號變成酒店，相信交通將有更多問題。


姚醫生又話，山頂消防局嘅車根本入唔到盧吉道27號，以往建築物有泳池，其中一個原因就係要救火，但新酒店設計會拆卸泳池，佢擔心如果發生事，緊急支援會唔足夠。