2016國際奧數 香港成功申辦

【明報專訊】相隔22年，香港繼1994年舉辦國際數學奧林匹克後，將於2016年再次舉辦奧數。今次搵到行會成員陳智思做活動贊助人，葉劉淑儀做榮譽首席顧問。噚日，國際數學奧林匹克香港委員會拉大隊，聯同陳智思、葉劉淑儀、立法會議員莫乃光同葉建源一齊開記招公布喜訊，簡直係星光熠熠。


國際數學奧林匹克香港委員會話，預計活動經費要2000萬，教育局原則上支持呢個活動，政府仲會贊助開幕禮同閉幕禮等開支。比賽為期10日，到時參賽者唔單止嚟比賽，仲會去參觀同交流。


陳智思話，申辦奧數，唔係淨係為咗尖子，仲要令香港人更加重視數學，同周邊國家地區競爭。點都好啦，奧數係國際學術界盛事，Emily恭喜申辦成功，希望到時搞得好好睇睇啦﹗