南區管弦樂團北京獻藝

【明報專訊】香港嘅管弦樂團唔算多，而由學生組成嘅南區管弦樂團，登上大雅之堂，獲邀到北京國家大劇院音樂廳公演，認真巴閉。領導樂團嘅係南區區議會主席朱慶虹，原來大有來頭，喺美國攞到音樂博士銜頭，返嚟香港出過音樂書籍同埋多張古典音樂唱片。


區會支持 市民捐款

Emily近日見到朱慶虹，佢話快要帶團出埠，仲好雀躍咁話，管弦樂團下禮拜喺北京表演兩場，8月5日應邀喺國家大劇院音樂廳，以「香港青年愛樂樂團」名義專場演出，樂團成員全係南區學生。


南區管弦樂團唔屬於政府資助樂團，但有區議會支持，靠民間捐款運作，民政署每周借出地區會堂3日畀樂團練習。樂團2001年成立，當時規模好細，朱慶虹一手一腳任指揮同教導，經過12年發展，家南區已發展出3個樂團，包括南區管弦樂團、青年愛樂樂團，同埋成長之音管弦樂團。其中，成長之音管弦樂團團員來自南區低收入家庭兒童。


樂團曾經揚威海外，去年底喺比利時國際青年音樂節同荷蘭國際音樂節比賽攞到樂團獎第一名，為南區爭光。