羅致光講不出聲

【明報專訊】特首梁振英上任至今，民怨愈積愈大，今年七一有唔少人遊行反映不滿，不過，以往都有去七一遊行嘅關愛基金專責小組主席羅致光，舊年同今年都無參與七一遊行。佢噚日出席無綫節目《講清講楚》時解釋，唔參與遊行同佢獲委任公職或政治立場無關，但就覺得自從舊年特首選舉後，對香港嘅政局同管治感覺變得好差，甚至感到悲傷。


無再去遊行非因公職

羅致光仲話，特首選舉以嚟所出現嘅社會矛盾，令佢感覺「非常之唔良好」，「所以我唔想喺條街度同其他人一齊去嗌『梁振英下台』，呢啲喺感覺上我覺得講唔出」。


稱對政局管治感悲傷

羅致光形容，近年香港嘅發展好似「逆水行舟，不進則退」，對比其他鄰近國家，競爭力不斷後退，原因係政府班子面對認受低嘅問題，令施政面對唔少障礙，如果唔改變特首選舉制度，即使更換班子都無辦法解決問題，所以佢強調2017年普選必須要係一個認受度高嘅選舉。