高永文只能踢西瓜波

【明報專訊】運動強身健體，身為醫生食物及衛生局長高永文當然深明此道，但佢噚日出席「無家者世界盃」活動時，大爆自己有踢波，不過「無速度、無技術、單蹄馬」，而且有「香雞腳」，無力踢真足球，而要踢西瓜波！

自嘲香雞腳 齋踢右邊

「無家者世界盃」香港代表隊將會8月10日至18到波蘭出賽，噚日搞個授旗儀式，高永文致辭時話佢係單蹄馬得右腳，只可以踢右邊，仲自嘲「踢右翼又跑得唔夠快，右輔又唔夠技術」，而且 「香雞腳踢皮球唔夠力，踢唔遠」，只可以「對住門踢西瓜波等反彈」。

無家者盃助吸毒者

今年係香港隊連續第九年參與每年一屆無家者世界盃，所有參賽者一生只可參與一次，目的係幫佢重建信心，完成比賽後可以走向光明。Emily噚日同兩名港隊成員傾過偈，佢都係曾經吸毒戒毒者。20歲劉勛強話，佢透過足球搵到新興趣，唔再沉迷毒品，有決心戒毒。佢希望透過世界盃將自己故事傳開去，感染過來人。