葉健民借題發揮講「WTF」

【明報專訊】小學教師林慧思講「what the fxxk」粗口，呢排搞到滿城風雨，估唔到連大學教授都忍唔住喺facebook講「WTF」。話說城大公共及社會行政學系教授葉健民噚日喺facebook講，「我姓葉，（賊王）葉繼歡、（全國政協前副主席）葉選平、（俄羅斯前總統）葉利欽、（詠春大師）葉問個葉，ok？」


記者劈頭話搵「陳」教授

Emily八卦問葉教授，佢話自從佔領中環發酵，多咗記者行家打電話問佢有關佔中問題，但唔知記者係想搵邊個，皆因佢哋劈頭就話想搵「陳」教授，睇嚟係將佢當咗佔中發起人陳健民教授。葉教授通常都會澄清就無事，佢仲話，喺facebook留言都係玩吓，對時事借題發揮講吓笑，起碼令記者行家搵人之前搞清楚要搵邊個，不過佢就唔肯講係邊個記者搞錯。葉教授又話，其實陳健民都係「苦主」，成日都有人打畀佢，以為佢係葉健民。