「包容警察講粗口」 登雅虎搜尋榜前列

【明報專訊】前日旺角「街頭大戰」引起廣泛關注，但市民關注嘅唔止林老師，仲有由執法者變成要角嘅警察。噚日Emily上雅虎網頁，發現「包容警察講粗口」同「搶槍誤會」呢兩個詞彙登上搜尋榜前列，似乎公眾都好想知警方最近發生乜事。


網民翻舊帳轟督察協會

督察協會早前譴責林慧思老師講粗口辱警，有網民翻舊帳，話有警官去年中喺警署內爆粗畀市民投訴，協會主席當時話市民反應過敏，叫公眾包容，於是網民瘋傳昔日新聞，令呢個字眼登榜。「搶槍誤會」就係前日有挺林者被警方指「搶槍」被捕，數小時後警方以「誤會」為由釋放。


警察討論區有人發帖以「八婆粗口事件大家記得去投票」為題，呼籲去雅虎新聞頁面就「『林慧思風波』，你撐邊個？」投票。截稿前撐林老師得票24%，家長聯會同香港行動得票69%，兩邊都唔撐嘅有7%。