李偲嫣月收10,500「車馬費」

【明報專訊】香港家長聯會有份周日喺旺角發起集會，支持香港警察執法，會長李偲嫣迅速「走紅」。Emily嘅同事日前報道，李偲嫣係立法會議員梁美芬嘅職員，李偲嫣當時話自己只收「車馬費」，Emily噚日去查吓啲單據，原來佢每月「車馬費」有10,500蚊，錢唔算少喎。


向立會報銷 梁強調請助理公開

據梁美芬議員辦事處向立法會報銷開支嘅紀錄，李偲嫣由2009年4月開始，就喺辦事處擔任兼職項目專員（Part-time Project Officer），月薪有1萬蚊，2011年中加人工至10,500蚊。梁美芬回應強調請助理公開透明，又話請唔起李偲嫣做全職顧問，所以只請佢做兼職，畀意見其他助理，撰寫關於青年同教育議題嘅文章。


另外，據悉李偲嫣嘅前夫叫劉兆安，有傳媒報道李偲嫣原名李艷青Lettie，其後改名李偲嫣Leticia。Emily發現，1995年上畫嘅一部電影《玻璃鎗的愛》嘅執行監製叫劉李偲嫣，主角係任達華同葉童，卡士都唔嘢少㗎，不過票房只得200萬元。Emily噚日打畀李偲嫣想求證有無監製過電影，佢只係話「我家同律師傾緊，唔會回答你任何問題」。李偲嫣今日會開記者會，話想回應佢受恐嚇嘅事。