林鄭明去下白泥睇堆填 李卓人要求家訪

【明報專訊】政務司長林鄭月娥早前承諾將堆填區問題攬上身，聽日就會親身到下白泥，睇吓屯門堆填區對居民影響。工黨李卓人前日到下白泥睇堆填區時，咁啱撞到官員幫林鄭探路，佢就問官員林鄭當日會睇咩啦，得到嘅答案係司長會去村公所，但唔打算做家訪深入了解喇。


阿人話，居民向佢反映不滿，因為最接近堆填區嘅民居，只係相距130米，佢前日去睇時，唔係吹正西南風，臭味唔算最嚴重，但點都有啲味，所以佢都好希望林鄭唔好只去村公所，應該深入民居了解，先可以知道最真實情况，佢亦將呢個訴求轉達林鄭嘅政治助理，希望林鄭考慮一下。


民主黨主席劉慧卿噚日亦去信林鄭，促請佢盡快到屯門、將軍澳同打鼓嶺，了解居民對擴建堆填區的意見，又要求當局喺未同議員、居民達成共識前，唔好強行向立法會財務委員會申請撥款。