理大生盧旺達「搭天地線」

【明報專訊】理工大學實施四年制後，推出學生必修嘅服務學習課程，學生出埠服務嘅話，校方仲會資助超過一半旅費，今年就有12個學生去咗非洲盧旺達做義工，為社福機構提供服務。


呢個社福機構專為當地人提供教育、醫療等服務，雖然得到善長捐助伺服器，但係職員唔識用，所以上網仲係慢過56K！理大學生於是花咗6日幫佢哋安裝好伺服器，仲教埋佢哋點做網頁、用facebook等，希望幫佢哋「搭通天地線」。


著住衫冲涼 由驚到愛

學生今次旅程都有另類體驗，其中一個男生話嗰度冲涼嘅地方無遮無掩，大家著住衫、成桶水照頭淋就叫冲咗涼，起初佢都唔慣，但當地實在太熱，佢日日流晒大汗，冲涼好快就變成佢最開心嘅節目，仲話開心過參加豪華旅行團，皆因唔係人人都有機會體驗落後地區生活。