一國兩制中心：無請傅振中

【明報專訊】啱啱退出「愛字頭」團體愛港之聲嘅陳廣文（圖中），「正名」叫番做傅振中，即成為周刊封面人物。《壹週刊》報道，根據線人爆料，話佢喺2008年起任職一國兩制研究中心，負責做「網路打手組組長」。而一國兩制研究中心總裁就係行會成員張志剛。呢篇報道又話，2009年至2013年，中央政策組花近210幾萬元，委託一國兩制研究中心做研究，包括「傳媒時事輿論研究」，「打手味極濃」。


一國兩制研究中心噚日即刻發出聲明，話佢哋從來未有聘請過陳廣文或傅振中，亦同「兩人」無任何聯繫往來，直指報道嚴重失實，要求《壹週刊》撤回報道，並會將事件交由律師處理，追究責任。中策組好緊張，噚晚急發聲明，話從未委託過任何機構參與網上討論或者活動。Emily噚日打畀傅振中，但未能聯絡到佢回應。