黃士心最唔鍾意二世祖

【明報專訊】康泰董事長黃士心近年過着半退休生活，旅行社業務放手交畀阿仔黃進達（Jason）打理，兩父子噚日難得同場同傳媒茶敘，黃生除咗宣傳自己寫嘅東京旅遊新書，仲講到成功之道，話自己後生時夠晒拼搏，30幾年唔放假，所以最唔鍾意人做二世祖咁話。


讚阿仔由低做起接班放心

黃士心暗讚寶貝仔Jason，話佢讀大學加埋進修足足用咗10年時間，畢業後喺康泰由低做起。見到黃生笑到見眼唔見眼，就知佢幾滿意阿仔表現啦﹗


黃士心話，成功之道不外乎3樣：勤力、誠意加創新，認為年輕人應該搏命工作，因為「做多啲係唔會死嘅」，又話好似Jason咁，接班做總經理至今都令佢好放心。黃生講笑話自己係「老餅」，應該要退位讓賢，得閒寫旅遊書、同May姐（飲食主持馮美基）一齊帶團，已經好開心喇。