友邦猛將跳槽保誠

【明報專訊】保險界兩大巨頭友邦（AIA）同英國保誠保險，經歷過保誠收購友邦、收購失敗、友邦又即將獨立上市，兩陣營不斷有新發展。兩家公司嘅高級要員，都來來去去。保誠噚日宣布，友邦營運部副總裁及助理總經理張敏慧，今個月已過檔去保誠香港擔任首席營運總監。

張敏慧喺友邦保險時，負責人壽保險營運、服務提升、客戶服務、投資相關營運，以及醫療服務嘅整體管理。2008年金融海嘯期間，友邦母公司美國國際集團（AIG）財困，友邦面臨退保潮時，張敏慧曾經出席友邦記者會，幫公司解圍。當時佢嘅上司，亦係現任嘅英國保誠香港行政總裁容佳明。

容佳明讚伊人經驗豐富

容佳明讚賞張氏喺核保、保單行政、理賠同顧客服務方面擁有豐富經驗。張敏慧過檔後，負責保誠嘅人壽保險行政管理、資訊科技及客戶服務。早前上任嘅友邦集團行政總裁杜嘉祺（Mark Tucker），亦都喺英國保誠集團擔任過行政總裁，所以見到呢兩家公司嘅管理層人員，都要問清楚佢哋家喺邊家公司工作。