內地同胞愛紅酒Lafite 貪個名夠易讀

【明報專訊】近年西洋紅酒價格飛升，我國富貴同胞係主要推動力，而國人最鍾情嘅品牌係法國酒Lafite（音譯「拉菲」) 。每年舉辦唔少紅酒拍賣嘅蘇富比紅酒部主管Robert Sleigh分析，國人咁鍾意Lafite，大概有5個原因，最簡單直接嘅係，Lafite呢個法國字，對佢哋來講較其他酒名容易發音。

《華爾街日報》日前訪問Robert ，講到點解內地同胞咁鍾意Lafite，佢歸納咗5大原因，首先係Lafite比起其他名字特長嘅法國酒名，對中國大陸嘅消費者較容易發音，其次係Lafite供應較穩定，價格冇咁波動，較適合投資，另外，Lafite屬於一個經典嘅牌子，而其所屬嘅酒莊，近年推廣策略亦好成功等等。

羅拔哥話，近年亞洲區嘅需求，主導咗全球紅酒市場，以蘇富比為例，佢哋家每年拍賣紅酒，有60％買家係來自亞洲，09年春季蘇富比喺香港舉行嘅紅酒拍賣會，有30％買家來自內地同胞。佢又預告，10月29日蘇富比會喺香港舉行一個專門為Lafite酒莊嘅拍賣會。