全港最高觀景台 下季ICC局部開放

【明報專訊】香港就快有個新景點！噚日新地（0016）業績報告話，位於九龍站環球貿易廣場（ICC）100樓嘅觀景台「天際100」，預計會喺第4季起陸續招待參觀人士。小琴打聽過，所謂「陸續開放」，係指初時只會局部開放，事關仲有部分樓面，仍會有裝修工程進行，將來會按照工程進度，開放畀公眾人士。下個月就進入第4季，究竟係咪10月就開放？新地方面就話，暫時未可以公布住，要保留神秘感咁話。

「天際100」海拔393米高，係全香港最高室內觀景台，面積約達3萬平方呎，可以360度鳥瞰全香港景觀。觀景台亦備有多媒體設備，讓訪客了解香港嘅發展及風土人情。另外，喺101樓，更設有高級餐廳，遊人可以一邊歎美食，一邊睇風景。