匯豐敲鐘仔 宣布推網上美股買賣

【明報專訊】「噹噹噹……」清脆嘅鈴鐘聲出現喺匯豐中環總行，唔係火警鐘，而係匯豐正式推出網上買賣美股服務。匯豐香港區個人理財業務主管麥倩華，聯同亞太區個人理財業務財富管理業務區域主管（小琴有時都唔明點解啲title可以咁長）李錦榮，雙雙敲鐘仔，負責呢個「開市儀式」。

匯豐之前不嬲都有電話買賣美股嘅服務，今次推埋網上買賣，每宗網上美股交易首1000股經紀佣金收18蚊美金，之後每股佣金1.5美仙。李錦榮話，香港買賣股票嘅人當中，大概有唔夠3％嘅人玩埋海外股票，即係約十幾萬投資者會玩港股以外嘅股票。雖然家買美股嘅人比例唔多，不過如果佣金平，話唔埋有啲投資者都有興趣研究一下。李錦榮話，玩埋外國股票嘅股民，通常都係投資組合較大，買賣多啲嘅人，匯豐今次就係針對呢班買股票嘅大客仔，推多個新服務畀佢哋用！