郭家麒將晤柯P為食水取經

【明報專訊】公民黨立法會議員郭家麒今日會飛去台北，同台北市長柯文哲（柯P）見面，就食水供應問題取經。公民黨喺鉛水事件中曝光較少，唔通郭家麒要遠赴台灣「抽水」補鑊？郭醫生否認補鑊，話早於5月已經約對方，又話希望可以喺未來一年推動乾淨飲用水法例（clean tap water bill）。


郭家麒話寫信約柯P時，對方爽快答應，笑言可能係因為大家都係同行（醫生），有共同話題。佢又話幾日前可能食錯嘢，搞到屙咗幾日，噚日仲未好，準備好一大袋藥物隨行，隨時「自己醫自己」。


郭家麒指今次出訪希望了解台北嘅食水供應及環保政策。佢話，台灣唔少公眾地方都有水機供民眾使用，希望香港仿效，減少拋棄膠樽。佢打算回港後約見環保局，冀政府推動喺政府大樓、交通交匯處及港鐵站等地方設水機。