申請續掌平機會？ 周一嶽口密

【明報專訊】周一嶽由問責局長轉到去做平等機會委員會主席，唔經唔覺已經兩年幾，明年3月31日就任滿，而政府噚日就宣布今日起公開招聘呢個位。究竟周一嶽會唔會申請續任？周一嶽透過平機會回應話，唔會公開透露會否申請，以免影響其他有意嘅申請人及政府嘅決定。


周一嶽話，做咗份工兩年幾，覺得呢份工充滿使命感及非常有意義，個會嘅內部管治、改革及對外工作，都取得一定成果。佢又指平機會係香港一個非常重要嘅法定機構，既維護香港國際城市地位，亦建設多元共融嘅社會及人人平等對待嘅制度，舉足輕重。


周一嶽於2013年卸任食物及衛生局長，4月當上平機會主席，任期3年，佢一上任就接手處理反性傾向歧視立法諮詢呢個棘手議題，高調出席同志團體「大愛同盟」音樂會，而每年嘅同志遊行，佢都親身撐場；平機會去年中就「歧視條例檢討」諮詢公眾，周一嶽指「蝗蟲」稱號帶有歧視成分，又惹起火頭，被人鬧佢偏幫內地人。平機會表示歡迎政府繼續以公開及透明嘅程序招聘下任主席。