警總阿sir接「收包裹」來電 騙徒普通話問資料 答：講廣東話

【明報專訊】電話騙案嘅騙徒有幾猖狂，Emily聽講連喺警察總部返工嘅警官，工作時都收到騙徒電話，真係名副其實老虎頭上釘蝨乸。有警官同Emily傾開電話騙案時，笑言有一日佢喺總部寫字樓，枱頭電話響起，接聽時有一段普通話聲音叫佢「收包裹」，阿sir心諗騙徒竟然打到去警總，咁即管同來電者「玩一玩」，偵查吓騙徒賣乜藥。


接着有女子以普通話問阿sir資料，阿sir話聽唔到普通話喎，叫佢講廣東話。普通話女聲猛同阿sir講話普通話好易，叫阿sir答普通話，阿sir拒絕，如是者來回兩三轉，阿sir就問，其實呢排好多人打電話呃人喎，對方先醒覺，隨即cut線。Emily心諗，騙徒真係膽生毛，唔知會唔會連一哥都唔放過呢。


兩岸詐騙集團6人被判囚

為打擊電話騙案，Emily見警方呢排除咗叫電訊商幫忙出短訊提醒，近期行動已火速拉人。


一個兩岸三地電話詐騙集團，6名負責開戶口收款同取款嘅內地及台灣人，落網後噚日上庭，承認串謀洗黑錢等罪，被判囚1年4個月至兩年。


被告依次為台漢章露峯，內地人葉君杰、羅偉杰、郭永俊、郭桂枝及高維新（23至53歲）。法官話，其中3人開設戶口，收取電話騙案嘅得益，其餘被告負責運送及匯款，協助主腦，批評被告損害香港嘅國際金融中心形象。