建制對建制 張宇人爭內會主席

【明報專訊】立法會10月復會，相信泛民、建制又會爆發爭位戰，但似乎建制派都內訌，正當經民聯梁君彥已擔任內委會主席3年，大家以為佢個位都好穩陣時，喺過去一年擔任財委會主席嘅自由黨張宇人（Tommy），就突然公開表明有興趣角逐內會主席，佢否認今次參選係涉及兩黨恩怨。Tommy覺得梁君彥做咗3年都辛苦喇，「唔介意幫輕吓」對方喎。身在海外嘅梁君彥就話唔評論喇。


Tommy話，佢自己唔係「一腳踏兩船」嘅人，所以不論選唔選到內會主席，佢一定唔會角逐財會主席，又認為如果佢去爭，即係破壞自由黨同吳亮星之間每人做兩年財委會主席嘅協調。對於有無信心爭得贏內會主席，佢就話呢刻講無信心㗎，但結果係點，佢都尊重議員嘅選擇，而佢亦計劃今日開始打畀立法會唔同黨派同事，開始拉吓票。


對於去爭做內會主席係咪破壞建制派協調，Tommy話2012年時，建制派的確有問過自由黨田北俊有無興趣做內會主席，田北俊一口拒絕，但Tommy話唔等於其他黨友無興趣，所以佢唔認為有破壞協調。