專業人士成立「灣仔廣義」

【明報專訊】佔領運動後，「傘兵」團體遍地開花，其中一個由昔日「佔領中環」義工組成、扎根灣仔嘅地區組織「灣仔廣義」，噚日同傳媒茶敘，仲邀得陳健民同戴耀廷撐場。雖然同佔中有淵源，但「灣仔廣義」召集人梁柏堅話，喺地區工作時，唔會打佔領旗號，因為係「唔work」，但會大力推廣公民參與。


「灣仔廣義」由多個唔同界別嘅專業人士組成，包括金融界、傳媒、攝影等，核心成員約10人。佢哋嘅目標係致力推動灣仔市民自主生活，建立一個人性化規劃嘅灣仔區。組織另一名召集人區麗莊說，資金都係靠組員籌募，平日嘅活動，例如區內「吹水會」，都唔需要使好多錢。


戴耀廷同陳健民現身，但佢哋強調唔係組織成員，只係支持者，並強調呢個唔係政黨，不過希望可以將佔領期間實踐嘅商討精神，帶入社會。


「灣仔廣義」嘅代表會積極考慮參加區選，佢哋話唔怕被人話同泛民「搶票」。梁柏堅話佢哋無黨無派，「唔係親泛民，係親民主自由」，但願意同其他泛民政黨協調。