愛女演話劇 傑哥有遺憾

【明報專訊】公民黨黨魁梁家傑平日講起特首或者中央政府就會火都嚟埋，但一講起愛女梁穎翹（Jennifer）就即刻變返慈父，笑容滿面。傑哥日前接受Emily訪問時，亦大談愛女同分享父母經。傑哥話，父母唔好自以為是，亦唔好假設知道仔女嘅潛質去到邊，要放手等小朋友自己發展，「小朋友愈自由，就愈願意背起責任」。但傑哥講明唔係放諸四海皆準，「有啲細路係唔知自己做緊咩……就要一步步來」。


Jennifer目前跟隨著名劇團Shakespeare's Globe做世界巡迴演出，早前嚟咗香港表演《王子復仇記》。傑哥話估唔到愛女喺戲劇方面有咁多潛質，話個女小學四年級時做過一次話劇，當時老師搵咗Jennifer參演一套原創劇做女主角，演一個叫「阿平」嘅女仔，「估唔到老師小四時畀個機會佢（Jennifer），鋪墊咗佢今天嘅路」。


嘆未能上京支持

早前Jennifer巡迴去到北京演出，但傑哥去唔到北京鳥巢睇個女做女主角表演，「到家都覺得係一件憾事」。傑哥話當時同太太商量過，如去到北京入唔到境或上唔到飛機就無謂啦，「我又唔恨呢啲新聞……當然亦唔想為我女兒製造壓力」。