湯家驊斥梁家傑拍枱罵人 與會者：兩人都好勞氣

【明報專訊】兩個大狀議員嘅爭拗仲未平息。星期三泛民開會，已經退出公民黨嘅湯家驊一入去，就畀主持會議嘅前黨友梁家傑叫佢出番去，令唔少人都好奇會內發生乜事。事件主角之一嘅湯家驊（Ronny）噚日喺facebook公開事件，仲話對梁家傑（Alan）非常失望！


Ronny話，當日一早已同Alan講只能喺11點半參與會議，佢準時到，但一推門入去，Alan就大聲話未到佢嘅議程環節，叫佢出去等，幾分鐘後民主黨何俊仁請番佢入去開會，佢就立即問Alan，有咩議題佢唔可以參與，仲當唔當佢係飯盒會成員？

點知講唔夠兩句，Alan就青筋暴現、不斷拍枱呼喝，Ronny引述Alan當時話：「你再係咁，我立刻停止會議，等你沒得講，要你即走！你係咪要咁？」大家鬧咗幾句，Alan唔肯再主持會議，其他人先推舉工黨何秀蘭做主持，大家先可以平心靜氣咁繼續開會。


Ronny話，Alan當時坐得最遠門口，但佢喝罵聲同拍枱聲，連門外記者都聽到，佢話Alan情緒失控已經早有前科，過去呢兩年仲愈來愈密，近排仲不斷有記者投訴畀他喝罵咁話。


梁公開道歉 湯不領情

Alan後來有就事件向傳媒道歉，但似乎Ronny唔領情，質疑對方係咪有心自我檢討，定係關心形象？噚日都有傳媒問過Alan，佢就話當日20幾人目擊事件，佢唔想做小朋友鬧交嘅事，唔會再回應。不過，有與會者都爆料，話其實兩個大狀當時都好勞氣，有人拍枱、有人拍iPad，奉勸兩位不如一人少句算啦！