郭炳湘唔講細佬 四季喻政治

【明報專訊】上年同新鴻基地產和平分手嘅郭氏家族長子郭炳湘，喺上周五晚出席佢設立嘅「郭氏學者協會」獎學金嘅圓桌會議，同學生交流，牛津大學校長賀慕敦同李鵬飛都喺度。對於高等法院上訴庭接納郭炳湘細佬郭炳江提出嘅上訴理據，會就案件進行上訴聆訊，郭炳湘就封口，話案件進入司法程序，唔方便講咁多。


「有時左好有時右好」

郭炳湘又同Emily講，「上訴期間唔講得咁多嘢㗎」，但就對近期嘅香港政壇有啲睇法喎。佢話政治成日變，好似春夏秋冬咁，幾年後又另一個樣，「有時左好有時右好」，近期好多爭拗，但睇到唔同派別有意思拉埋一齊。


佢舉例話好似北京官員同民主派會面，大家多咗溝通，如大家有共同目標，香港嘅政治環境就會愈來愈好。佢又話，香港嘅政治人才不斷老化，希望透過資助年輕人去牛津大學讀書，為培育人才出一分力。