國慶酒會祝酒 CY財爺未碰杯

【明報專訊】十一國慶將至，多個團體都陸續舉行國慶酒會，噚日特首梁振英（CY）同財政司長曾俊華（財爺）一同現身香港工商界同胞慶祝國慶酒會，同場亦有前特首曾蔭權。祝酒時，CY喺台上同財爺未有碰杯，有同曾蔭權碰杯；CY離開時就有同財爺揮手講拜拜。


噚日多名司局長都有出席酒會，包括律政司長袁國強、商務及經濟發展局長蘇錦樑。但財爺遲到，喺酒會籌備委員會主席楊釗致辭期間先上台。


財爺喺台上企喺靠邊位置，CY企正中間，二人相隔幾個身位，祝酒時，財爺走近中間同其他嘉賓碰杯。雖然財爺當時同CY只差一個身位，但兩人「擦身而過」未有碰杯。而CY就有同曾蔭權碰杯。


曾蔭權笑容滿面

過去一段時間都甚少見到曾蔭權出席公開酒會，佢噚日笑容滿面，但酒會儀式完結後就喺後門離開。CY同財爺祝酒後，各自去到台下同在場人士影相，兩人都好受歡迎。