有意選人代？ 李慧琼話好忙

【明報專訊】港區人大代表5年任期，今屆至今過咗一半，雖然仲有兩年幾先到下次選舉，但由於港區人代只得36個，喺香港政壇以至內地都有一定地位，所以政圈中人茶餘飯後都會談論吓有邊個將會退下火線、又有邊個有意參選，Emily近日聽聞，建制圈子有傳民建聯主席李慧琼（Starry）似乎下屆都有意參選人代，繼「三料議員」後，唔通Starry真係會再上一層樓？

料三分一港人代下屆退下

一般估計，現時36個人代中，大約有三分之一下屆會退下火線，好似全國人大常委范徐麗泰，人代譚惠珠、劉健儀、劉佩瓊等，個個年紀都有番咁上下。而中央一直有意搵專業人士做人代，咁Starry年輕、專業呢個背景亦好符合。


不過，Starry家已經係行政會議、立法會、區議會三料議員，仲係香港第一大黨主席，佢仲有無時間兼顧多一項公職呢？Emily噚日問過Starry，對於有傳言佢會參選人代，佢話自己都未聽過呢個說法，強調自己工作好忙好充實，無諗過選人代呢回事。


其實除咗Starry，政界亦一直有人講，經民聯梁美芬似乎都有意選人代，特別佢有法律背景，相信對中央亦有一定幫助。但相信無論邊個有興趣選，睇怕都要等到2017年中先會浮面喇。