劉江華密見議員 被指「好想洗底」

【明報專訊】民政事務局長劉江華（劉華）上任後密密同議員見面，公民黨立法會議員陳家洛話，上星期五同劉江華見面，大談地區行政、保育，以及青年事務等議題。陳家洛形容劉江華作為局長都仲好green，相信佢仲摸索緊，又話「覺得劉江華好想洗底咁」。


晤陳家洛 話一定會公道處理問題

唔少人都質疑身兼民建聯成員嘅劉江華，喺處理民政事務上會唔會偏向建制派。陳家洛話，劉華同佢強調一定會公道地處理問題。佢哋見面火花唔多，陳家洛話雙方就多項議題交換意見，包括地區行政、社區規劃、文物保育，以及青年工作等，而劉華對社區規劃似乎都幾有興趣。


陳家洛話，最近亦有同青年事務委員會主席劉鳴煒會面，傾吓青年交流活動工作。民政局嘅朋友就話，劉華局長上任兩個月，仲喺度約見唔同黨派唔同團體人士，而今屆立法會尚餘一年任期，所以劉華都想把握時間，同政黨傾傾工作嘅優先次序，睇吓有邊瓣工作大家認為值得繼續做，又有邊啲需要加強喎。