金管局1年收逾億「神沙」

【明報專訊】金管局去年10月開始咗一個硬幣收集計劃，每日派兩輛「收銀車」去全港十八區循環收集硬幣，免費幫市民換紙幣或者充值八達通。金管局昨就公布，短短1年過去，兩架車竟然已收集咗1億零700萬枚硬幣，總面值已達1億1200萬港元。


原來嗰兩架車都幾唔容易，一年裏兜咗香港十八區成五次，至今已進行咗12.3萬宗生意，咁樣算來，平均一個人都有成910蚊散紙換，乜自己咁有錢都唔知？小琴家就決定返屋企翻箱倒櫃搵吓散銀！

市民如果仲未搵「收銀車」換硬幣，唔緊要，呢個硬幣收集計劃會持續到明年9月份，每輛「收銀車」都會喺同一地點停留一星期，上午9時到晚上7時都係可以過去換㗎，快啲返去探索吓自己有幾有錢！

[小琴密語]