葉太周日再會麒麟

【明報專訊】新民黨主席葉劉淑儀今年農曆大年初二喺車公廟被「麒麟」撞倒，全城哄動，事後又有政黨中人飲麒麟啤酒贈興抽水；不過，葉太似乎無禁忌，周日（20日）夠膽再會一會麒麟！

Emily噚日收到採訪邀請，話有個叫「客家功夫文化研究會」嘅團體，周日搞就職禮，搵咗葉太做永遠榮譽會長去主持儀式。呢個會嘅會長係趙世光個仔、熱愛武術嘅趙式慶，主席係李石連師傅，而鄉議局主席劉業強就係永遠榮譽主席。


呢個會成立嘅宗旨，係要保存同發揚傳統客家功夫，所以喺就職禮上，會有約10個功夫門派成員露兩手，仲講明會有麒麟表演！唔知葉太屆時會唔會小心企位以免再中頭獎嘞。