甘道警隊博物館 有六七暴動展品

【明報專訊】警方近日被發現刪改其官網內所載歷史，喺六七暴動一節刪去如「毛語錄」、「鬥委會」、「紅色肥貓」等字眼，事件令專門研究六七暴動嘅專家都感到可惜。Emily聽講其實除咗警察網頁，警隊喺山頂甘道嘅警隊博物館，都有唔少有關警察嘅文獻同歷史，Emily噚日去睇吓博物館會否如網頁般有所更新，結果發現館內有唔少六七暴動嘅記載，展板及展品都「有歷史痕迹」，唔似有所更新，當中文字介紹有「六七暴動」字眼，亦有暴動相片。


展英女王賜封警隊「皇家」憲報

警察博物館展板亦有介紹1967年5月爆發嘅暴動，提到當年有10名警員殉職、200多名警員受傷。Emily參觀時見到館內「警隊今昔」展覽廳，展示暴動嘅相，亦有一張係當年暴動後香港政府嘅「憲報號外」，當中提到英女王賜予警隊及輔警「皇家」嘅榮譽。