民建聯今訪粵 倡為港青增實習機會

【明報專訊】民建聯7月訪京見領導人後，今日又會帶隊到廣東省訪問兩日，會拜訪廣東省領導、廣東省嘅港澳辦同發改委。今次訪粵係由黨主席李慧琼帶隊，團員仲有會務顧問譚耀宗、副主席陳勇、陳克勤、監委會主席盧文端等17人。咁多領導層一齊去廣東省，民記就話會向對方提四大重點關注、13項建議喎。


李慧琼話，佢哋都好關注加強粵港兩地合作，應對經濟下滑風險，又希望推進廣東省自貿區發展、加強兩地空域合作，以容許更多車可以使用港珠澳大橋。近日市民都好關注跨境電話騙案，但李慧琼就話今次唔會拜訪公安，但有機會都會再向相關官員提及。至於今次訪粵會見咩人呢？李慧琼話會爭取獲廣東省委書記胡春華接見，但今日先可以確實到。


至於民建聯今次會提嘅另一個建議，就係希望內地政府可以為香港青年提供更多實習機會，安排佢哋去部門「掛職」，以便了解國情，又希望廣東省可以設立港澳青少年交流培訓基地等。