「狼人」月底來港舞火龍

【明報專訊】周日就係八月十五，港島大坑年年中秋都會舞火龍，今年有啲特別，事關曾經扮演「狼人」嘅國際影星曉治積曼（Hugh Jackman）將會親身上陣。曉治喺中秋期間嚟香港宣傳新戲《小飛俠：魔幻始源》，希望可以順道感受香港地道傳統節慶。


旅發局搵咗大坑坊眾福利會幫手，安排曉治當晚揮動珠球，帶領火龍，Emily聽到都好羨慕。當晚旅發局主席林建岳仲會盡地主之誼接待曉治，向佢講解舞火龍嘅歷史背景同香港中秋節傳統習俗，唔知狼人會唔會即場試食月餅呢？


旅發局同Emily講，曉治積曼係第一個參與舞火龍嘅影星，所以大家都好緊張，已經視察過現場。當晚會有超過50個亞洲區嘅媒體採訪曉治舞火龍，旅發局亦會透過國際新聞社轉發盛况畀世界各地媒體，希望藉此增加香港曝光率，同埋向遊客推介香港獨特文化。圖為旅發局提供嘅劇照。