郭榮鏗再添丁：想港人生多啲 北大人請收聲

【明報專訊】公民黨法律界議員郭榮鏗（Dennis）上周末再添丁，佢噚日喺facebook上載抱BB相，母子平安。Emily恭賀Dennis，多口問句佢家有兩位公子，會唔會考慮追多個女呢？Dennis就話當然想啦，但忙於湊仔嘅佢都不忘談政事，話如果想香港人生多啲BB，唔該請中聯辦主任張曉明、全國港澳研究會會長陳佐洱等北大人收聲，唔好煩香港人咁多喎。


笑問「去殖」不可改洋名？

Dennis話，如果京官事事過問香港事務，佢作為議員就真係好忙，咁邊有時間生女？佢仲話京官、學者再講咁多嘢，香港人真係唔敢生BB！Dennis一早已經幫BB改名Evan，但噚日陳佐洱話香港要「去殖民化」，Dennis就講笑反問，「去殖民化，係咪唔可以幫個仔改洋名？」