無家者盃港球員獲公平競技獎

【明報專訊】一年一度嘅無家者世界盃前日完成比賽，香港隊今年喺47個國家及地區之中排第32，成績不過不失。更開心嘅係香港隊首次有球員奪得賽事嘅公平競技獎，即使未必場場贏波，但都贏咗風度。


攞到公平競技獎嘅劉柏汭（鴻仔），喺對希臘場比賽嘅半場休息時，見到對手有個都應該起碼成60歲嘅球員，拎住一排成6支水，諗住跨過球場圍板。鴻仔見到，就走埋去幫呢個希臘伯伯拎住嗰6支水，扶佢走去場嘅另一邊。


鴻仔同Emily講，當賽會頒個公平競技獎畀佢時，都覺得好出奇，因為當時佢只係見到個希臘伯伯有需要幫手，就埋去幫佢，估唔到會有人見到佢咁做，仲因為咁攞咗個獎。


今年28歲嘅鴻仔，細個時誤入歧途，因為吸毒、打交等多次出入男童院，20歲時入咗壁屋監獄。喺監獄佢突然覺悟，自覺廿歲人乜嘢都無，終於成功戒毒，出番嚟參與香港青少年服務處心弦成長中心嘅足球隊，從球賽中，以前同人有少少碰撞就會同人爭執，家學會控制自己情緒。