盈盈無聲氣 柔柔假懷孕

【明報專訊】海洋公園大熊貓盈盈今年2月遠赴四川，參與繁殖計劃同其他熊貓交配，佢上個月終於返咗香港，暫未見有孕味，但海洋公園話，通常要熊貓待產前兩星期先可確認有無懷孕，所以仍然樂觀。Emily等盈盈有喜等到頸都長，好在海洋公園其他動物好爭氣，最近有二趾樹懶同印度太平洋樽鼻海豚生咗BB，恭喜恭喜。


海洋公園再添丁

至於早前傳出孕味嘅小熊貓柔柔原來食詐糊，海洋公園證實咗係假懷孕。熊貓添丁未有望，但「熱帶雨林天地」就有喜訊，住喺嗰度嘅二趾樹懶Sal和英木，6月初生咗BB。二趾樹懶BB家學緊爬上附近嘅樹枝，至於係仔定女就要再檢查先揭曉。


另一新成員係7月出世、外號「Halo」嘅雌性印度太平洋樽鼻海豚，家由媽媽餵哺，仲開始接觸其他年幼海豚，預計兩個月大至食吓魚肉，3年後先可以斷奶。


除咗公園內繁殖，海洋公園都有「新移民」。喺四川嚟嘅5歲雄性川金絲猴其其，通過隔離檢疫後，8月中入住「四川奇珍館」同兩隻雌性川金絲猴樂樂同虎虎做伴。