首架「輪椅巴」退役 百車迷送別

【明報專訊】九巴第一架方便輪椅乘客上落嘅超低地台巴士，經歷18年日曬雨淋，噚日揸埋最後一轉正式退役。超過130個巴士迷一早聚集喺中秀茂坪總站，搭埋真真正正嘅「尾班車」。


超低地台九巴 退役放車廠

呢架由中秀茂坪總站開去尖沙嘴碼頭嘅1A巴士，來頭非常「架勢堂」！九巴話，1997年為咗方便坐輪椅嘅乘客上車，專登要求生產商研發雙層超低地台巴士，當年6月引入時係全球第一部可以容納輪椅乘客嘅超低地台雙層巴士。由於巴士車身用咗金色，巴士迷都叫佢做「金巴」，當年首批巴士車長之一嘅文康發都好招積咁講﹕「都幾威㗎！金色喎！我幫佢改咗個名做一哥！」


Emily記得細個時搭嘅巴士，車門迫到好似肥啲都上唔到，更何况係輪椅人士，九巴企業事務總監陳碧君就話，當年正正因為咁，好多行動唔方便嘅人就避免出街，自從有咗呢款巴士，佢哋上落就方便好多，其他巴士都陸續採用呢種設計。呢架退役巴士之後會放喺九巴車廠，九巴預計2017年後，所有無輪椅區嘅舊式巴士會全數退役。