國慶賽馬日 肚皮耳朵同受用

【明報專訊】下個禮拜四係國慶日，馬會每年都會舉辦國慶賽事，除跑馬外仲加啲節目畀馬迷，今年嘅國慶賽馬仲大陣仗，有男高音獻唱、雜耍，馬迷肚餓時仲可以買到中國各省風味小食，臨走時又可以買個國慶賽馬日紀念封做留念。


邀歌唱雜技團 首辦美食廣場

國慶賽馬日喺10月1日中午12點開幕，先由男高音歌唱家兼國家一級演員遲立明獻唱，並喺香港警察樂隊伴奏下領唱國歌，之後就由中國國家級雜技藝術表演團體「中國雜技團」表演雜技。而馬會第一次搞美食廣場，推出多款中國各省風味菜式，包括上海菜飯、北京餃子、重慶酸辣粉同四川豆酥牛蛙腿等等，馬迷可以邊食邊睇賽馬。


馬會將成個賽馬日搞到又運動，又藝術，又美食，又文化，花10蚊雞入到場，唔賭都可以玩吓同食吓。